IRAUTEA BAINO GEHIAGO

Jai-Alivek hirugarren urtea bete berri du, eta balantze positiboa egin du: zirkuitua eratu du, jaialdi asko antolatu eta ikusleak erakarri ditu. Halere, kexa ere badu, ETBren aldetik jasotako tratuarekin bereziki.

BERRIA - Imanol Magro
Iruñea

Izenaren hitz jokoa aldatu beharko dute. Jai-alai eta Alive-ren arteko uztartzea. Jai-alai eta bizia. Irautea. Ez da arraroa, erremintan, tamalez, egunerokoari eustea ez delako erronka txikia. Urteak pasatuta, baina, badago gora egitera lortzen duenik. Jai-Aliveren eredua da. Beste enpresa bat izatetik erreferenteetako bat izatera pasatu baita. Hirugarren urtea bete du, eta lehen zirkuitua eratu du jada. Kontzeptu berritzailea da, eta pozik daude bertako arduradunak. Hala dio behintzat Iñaki Egigurenek, enpresako buruak. «Balantze ona egin dugu. Baikorra. Jaialdi gehien antolatu dituen zesta-punta enpresa gara, eta ikusleak erakarri ditugu. Plaza berriak aurkitu ditugu ere, eta hori garrantzitsua da».

Urteko jardunaren bizkarrezurra Orange zirkuitua izan da. Bukatu berri da, eta Iker Foronda izan da puntu gehien batu duen pilotaria. Egitasmoa luze eta konplexua izan da, hamaika torneokoa. Markina eta Donostia bezalako plaza klasikoak, Iruñea, Hondarribia edo Bartzelona (Katalunia) bezalako hiriekin uztartu dituzte. Hurrengo urtera begira torneo kopurua handitu nahi dute, eta ahal den moduan hedatu. Aldi berean, ustekabe gozoa jaso dute Hondarribian. Jaialdi ugari antolatu dituzte bertan, eta Egiguren pozik dago harrerarekin. «Ipar Euskal Herrian zesta-puntak jende asko erakartzen du, eta eredu hori jarraitu behar dugu. Bost urte barru Hondarribia Donibane Lohizune edo Miarritze bezalako plaza izango da».

Hondarribian, gainera pilota eskola sortzen lagundu dute. Irakasleak Jai-Alivekoak dira, eta bi multzo sortu dituzte. Batean gaztetxoak dituzte entrenatzen, eta bestean helduak. Enpresako burua harriduraz mintzo da. «Hondarribikoa harrigarria izan da. Dozena bat jaialditik gora jokatu ditugu, eta herriko jendeak lagundu egin digu. Beste edozein lekutan jendeak padel, squash edo antzekoetara jotzen du. Hondarribian, aldiz, jende helduak ere zesta hartu du aisiarako».

Bartzelonan ere gustura ibili dira, eta heldu den urtean berriz joango dira. Bertako euskal etxearekin elkarlanean esperientzia polita izan zuten. Egigurenek aise azaldu du zergatia. «Kudeaketa txarraren erruz Euskal Herrian galdu badu ere, atzerrian zesta-puntak xarma handia du oraindik». Ereduari jarraiki, litekeena da heldu den urtean zirkuituan antzeko beste hiri batzuekin ausartzea.

Zirkuitutik kanpoko torneoetan ere txukun aritu da enpresa. Miarritzen Urrezko Xistera irabazi zuen, eta Maulen eta Donibane Garazin ongi aritu zen. Ipar Euskal Herriko Torneoetako antolatzaileak Jai-Aliverekin harremanetan jarriak dira honezkero, heldu den urtean Eusko Basqueko pilotariekin batera lehiatu daitezen. Albiste garratzena, aldiz, Munduko Pilota Batzarrak antolaturiko Munduko Txapelketan jaso zuten, finalerdietan bikote bakarra sartu baitzuten. Egigurenek, baina, garrantzia kendu dio. «Txapelketa ez zen gure helburua, gure helburua zirkuitua indartzea zen. Gainera, bi bikote baino ez zizkiguten onartu eta multzoen zozketak ez zigun gehiegi lagundu».

TELEBISTA ETA FITXAKETAK. Enpresa hazten ari da, baina Egigurenek traba ugari izan dituztela onartu du. Pilota profesionalean telebista ia ezinbestekoa da, eta hor du kexa enpresaburuak. «Jaialdi ugari antolatu arren, ETBkoentzat ez gara existitzen. Jasotako tratua lotsagarria da, bizkarra eman digute». Aldiz, telebista txikiagoetan eman dituzten partidetako kalitatea goraipatu du, baliabide urriagoak izan arren. Irrati eta hedabideetan jasotako oihartzunarekin ere pozik dago, erremintak alde horretatik garai txarrak bizi dituela onartu duen arren.

Heldu den urtera begira pilotari taldea indartu nahi dute. Bide horretan, Imanol Lopezek, enpresako izarretako batek lau urterako kontratua sinatu du, eta Mikel Egiguren ere Euskal Herrira itzultzekoa da anaiaren enpresan jokatzeko. Bi hauek munduko txapeldunorde izan ziren 2006an elkarrekin. Alex Rekaldek ere udako sasoia Jai-Aliverekin egingo du aurten, uztailerako Euskal Herrian egongo baita. Beste bi beteranok ere Dania utziko dute Jai-Aliven aritzeko: Pedro Irusta atzelari markinarra eta Javier Otxoa aurrelari gasteiztarra. Berriei lekua egiteko beteranoek erretiroa hartu behar dute, eta Iñaki Goitia izango da hurrengoa. Aulestiko atzelariak urte bukaeran hartuko du erretiroa, profesionaletan 29 urtez jokatu ondoren.

«Kudeaketa txarrarengatik Euskal Herrian galdu badu ere, zesta-puntak oraindik xarma asko du atzerrian»

Iñaki EGIGUREN
JAI-ALIVEKO PRESIDENTEA